في يومه العالمي .. لا يوجد مُعاق إنّما هُناك مجتمع مُعيق.

الحدث الٱن .. الزجال عزيز محمد بن سعد

هاذي خذوها مني بالتحقيق .. نهار يعيق المجتمع ويفيق .. غادي يرجع من نص الطريق .. باش يحاسب ذوك اللي صاطو ليه في وذنيه التخربيق .. حتى خلاوه يفرط في اولادو .. يركب عنادو .. ويكمل بلا بيهم مسيرة التفريق .. ما بين الصحاح وقلالين الصحة مرة بالنخال ومرة بالغميق .. وكمل من راسك يا لبريق .
الدنيا بحال شي حلقة في ساحة جامع لفنا .. وهكا ولفنا موالين لْفَاعْ بوحدهم .. شرَّابين الما طايب بوحدهم .. وموالين احماد وموسى بوحدهم .. وموالين الازليات والحجايات بوحدهم .. وانا فين ما حاجيتك .. تدور عليا وجهك .. وتقول ليا لاش جيتك ..؟
انا معاق .. ويلا جيتي تحقق تحماق .. صابني بها الله وما اختاريتهاش بيدي .. وانت علاش غادي تحاسبني يا سيدي .. هانا كبكي عليك في يوم عيدي .. كنشكي عليك ولقيتك مضرك عليا بحال ايلا لاعب معاك الزديدي .. ايه وشكون يخلص عليا هاذ الكريدي .. اش بغيتي الحياة تبقا تسال فيا كلشي .. فينا هو تعليمها .. وتكوينها .. وادماجها .. وتشغيلها .. وتغطيتها الصحية …. ليا وليك الله يا وليدي .
شهد يا طه حسين يا روزفلت ويا بيتهوفن .. هاذو قلبو علينا بالفن .. دارونا حنا بحال ايلا ما كاينينش هن .. ما مسوقينش وخلاوك انت تهرنن .. شدو يدينا لواوها .. بحال شي صفحة وطواوها في كناش السهو …. هي حكاية ورواوها .. وفرضو على الزحاف ينقز الحيطان .. والاعمى يخيط الكتان .. والصمك يسمع حس الذبان .. والزيزون عيا ما يعاود ويتسراح في حكاية زمان .. على اش واقع تحت قبة البرلمان .
مشرعين فمهم حتى لهنا .. ونساو القوانين اللي تضمن لهنا .. خلاها ستيفي ووندير : ” ابنادم ايلا عماه الله .. ماشي زعمة راه ما بقاش يشوف ”
معازلين علينا .. ومخلينا في التوش .. واش حنا ما نلعبوش .. قتلتنا غ الغمولية في البرتوش .. حشمنا وعركَنا وقطعو علينا الما ديال الدوش .. واش زعمة باقي ما حشمتوش .. تلقاو لينا شي بلاصة في قلوبكم يا اولاد لفشوش .
كتب في السبورة .. هاذ جوج سطورة .. ايلا ما لقيتي مع من تلعب الكورة .. غوت على حر جهدك لمنتخب الأطراف المبتورة ..
خلقنا الله يا وليداتنا .. باش نكملو بعضياتنا .. اللي ناقصة فيا انا .. كملها انت .. كلنا مسؤولين على تعمار الشوارج بالهضرة .. باش تبقى زعمة الدنيا خضرة .. فوق هاذ الارض السعيدة .. وارى ما عندك .. زرع هنا وريدة .. وغرس هنا قصيدة .. والعيب جد العيب هو تفش الرويضة .. وما نلقاش من يصاوبها .. وراك عارف تصاويب لخواطر فريضة .
ما تلقاش شي واحد في الدنيا غير زايد هكاك فابور .. ضروري يلعب فيها شي دور .. باش تبقى عكارب الساعة كتدور ..
سبحان الله بحال ايلا انا اللي اخترت نكون معاق .. لويت رجلي حتى سمعت طرطلاق .. ورضيت نعيش برجل وحدة في محرك السباق .. هوما عاطينها للتعلاق .. ومخلينك انت وراهم تجري وتجاري وتقول ما جريت في ارض النفاق.
انا بعدا من هاذ العيد .. قررت نبدا عهد جديد .. جاتني عيب نبقى بحال شي نخلة .. نايضة في الخلا .. وسمحات في تمرها والجريد .. اللا انا غادي نضارب نكحز ونزيد .. ما عندي علاش نبقا هارب .. لهروب ما عندو باش يفيد .. بغاوني نكرم من الخاطر .. ويحطبوني كيف لوكَيد .. وذيك الساعات ما غادين يخسرو عليا والو .. لاخطا يقرعو فيا لوقيد ..
بقات قطرة وحدة .. وكاس لمرار يفيض .. اللا انا هاذ المرة .. غادي نصاوب بهاذ الليد .. فلوكة ونعكدها بسلوكة من لحديد .. نهرب من موتي ونخلي شاهد لقبر ورايا فريد .. ضد في كاع اللي ربطوني وما خلاونيش نزيد .. باش نبين ليهم ان حتى التمرميد .. كيصنع الناس اللي تقدر تفيد هاذ لبلاد السعيد .
انا بعدا قادر نكون عافية .. تحرق بلسانها لمحافية .. وجلايل النكران الوافية .. ايلا كانت مجامر بر لمان دافية .. ولقيتو فيها لامان وغير بوحدها كافية .. دابا تهبا وتعمي برمادها العين لصافية ..
شفتي اعاقة الذات بالذات ليها الدوا .. اما اعاقة الروح ايلا بدات هاذيك هي اللي ما ليها دوا .